పదవి ఉన్నప్పుడు.. అధికారం చేతిలో ఉన్నప్పుడు ఏదైనా సాధ్యమే. ఒకసారి పదవి పోయిన తర్వాత ఎదురయ్యే ఇబ్బందులు చిరాగ్గా ఉండటమే కాదు.. బయటకు చెప్పుకోలేని పరిస్థితి ఏర్పడుతుంది. తాజాగా అమెరికా మాజీ అధ్యక్షుడు డొనాల్డ్ ట్రంప్ అలాంటి ఇబ్బందినే ఎదుర్కొంటున్నారట. వైట్ హౌస్ ను వదిలి ఫ్లోరిడాలోని పామ్ బీచ్ దగ్గర్లోని నివాసానికి మారారు.
ప్రస్తుతం భార్య మెలానియా.. కొడుకుతో కలిసి ఉంటున్నట్రంప్.. ఖాళీ సమయాల్లో గోల్ఫో ఆడుతూ ఎంజాయ్ చేస్తున్నారు. ఈ క్రమంలో ఆయన నివాసానికి దగ్గర్లో విమానాలు తిరగటం ఒక విశేషం అయితే.. ఆ విమానాల మీద ట్రంప్ ను విమర్శిస్తున్న వ్యాఖ్యలు ఉండటం సంచలనంగా మారింది. ట్రంప్ ఎప్పుడూ చెత్త ప్రెసిడెంటే అన్న క్యాప్షన్ ఉన్న ఒక విమానం చక్కర్లు కొట్టింది.
మరో విమానం మీద.. ట్రంప్ నువ్వు ఘోరంగా ఓడిపోయావ్.. తిరిగి మాస్కోకు వెళ్లిపో అనే క్యాప్షన్ ఉన్న విమానం ఆకాశంలో చక్కర్లు కొట్టటం కనిపించింది. ఈ విమనాల్ని కొందరు వీడియోలు తీసి.. సోషల్ మీడియాలో పోస్టు చేయటం ప్రస్తుతం అది కాస్తా వైరల్ గా మారింది. ఈ విమనాలకు సంబంధించి తమదే బాధ్యత అని ఇప్పటివరకు ఎవరూ ప్రకటించుకోలేదు. పదవి పోయిన తర్వాత కూడా ట్రంప్ ను వదలటం లేదే.. అన్న మాట వినిపిస్తోంది. అధికారం లేనప్పుడే కదా.. అసలు ఇమేజ్ బయటకు వచ్చేది.
