‘ఆచార్య’తో కలిసి యుద్ధానికి వెళుతోన్న సిద్ధ

మెగా స్టార్ చిరంజీవి, స్టార్ డైరెక్టర్ కొరటాల శివల కాంబినేషన్ లో రాబోతోన్న ‘ఆచార్య’ చిత్రంపై టాలీవుడ్ లో భారీ అంచనాలున్నాయి. సెకండ్ ఇన్నింగ్స్ మొదలెపెట్టిన చిరు వరుస హిట్లతో దూసుకుపోతుండగా….కొరటాల శివ తన మార్క్ సినిమాలతో మంచి ఫామ్ లో ఉన్నాడు. దీంతో, వీరిద్దరి కాంబోలో రాబోతోన్న ‘ఆచార్య’ కోసం మెగా ఫ్యాన్స్ ఎంతగానో ఎదురుచూస్తున్నారు.

ఈ చిత్రాన్ని మెగా హీరో రామ్ చరణ్ నిర్మిస్తుండడంతో ఈ చిత్రంపై అంచనాలు విపరీతంగా పెరిగిపోయాయి. సందేశాత్మక చిత్రాలతో కమర్షియల్ హిట్ లు కొట్టడంలో ఆరితేరిన కొరటాల, చిరుల కాంబోలో మరో హిట్ రాబోతోందని చిరు ఫ్యాన్స్ ఎదురుచూస్తున్నారు. ఈ చిత్రంలో తండ్రి సరసన మెగా పవర్ స్టార్ రామ్ చరణ్ తేజ్ కూడా ఓ కీలక పాత్రలో నటిస్తుండడంతో మెగా ఫ్యాన్స్ జోష్ కు హద్దుల్లేవు. ఆ సినిమాలో చెర్రీ పాత్ర ఎలా ఉండబోతోందన్న ఆసక్తి మెగా ఫ్యాన్స్ లో ఉంది.

ఇప్పటికే చెర్రీ లుక్ ఒకటి విడుదల కాగా తాజాగా చెర్రీ బర్త్ డే సందర్భంగా మ‌రో పోస్ట‌ర్ ను చిరు విడుద‌ల చేశారు. చిరు, చెర్రీ ఆర్మీ దుస్తుల్లో ఉన్న ఫొటో ఇపుడు సోషల్ మీడియాలో వైరల్ అయింది. ఇద్ద‌రూ రైఫిళ్లు ప‌ట్టుకుని పోరాటానికి వెళ్తున్న‌ ఫొటో నెట్టింట్లో హల్ చల్ చేస్తోంది.

ఆచార్య “సిద్ధ “…#HappyBirthdayRamcharan అంటూ తనయుడు చెర్రీకి చిరు బర్త్ డే విషెస్ చెబుతూ ట్వీట్ చేశారు. ఇంతకన్నా మంచి బర్త్ డే గిఫ్ట్ ఏదీ ఉండదని, మీ పక్కన నటించడం కలలా ఉందని చెర్రీ రీట్వీట్ చేశాడు.