టాలీవుడ్ లోని స్టార్ హీరోల జాబితాలో అగ్రస్థానంలో ఉండే పవర్ స్టార్ పవన్ కల్యాణ్ కు ఓ ప్రత్యేకమైన గుర్తింపు ఉంది. రాజకీయాల్లోకి రాకముందు నుంచే సామాజిక కార్యక్రమాలలో చురుగ్గా పాల్గొనే పవన్ కు చాలా స్ట్రాంగ్ ఫ్యాన్ బేస్ ఉంది. హిట్, ఫ్లాప్ లతో సంబంధం లేకుండా పవన్ సినిమాకు ఓపెనింగ్స్ వచ్చేవంటే పవన్ పై మెగా ఫ్యాన్స్ అభిమానం ఎటువంటిదో అర్థం చేసుకోవచ్చు.
అందుకే, పవన్ సినిమా విడుదలై మూడేళ్లవుతున్న పవర్ స్టార్ పవర్ ఏమాత్రం తగ్గలేదు. రాజకీయాలతో బిజీగా ఉన్న పవన్… మూడేళ్ల తర్వాత నటించిన ‘వకీల్ సాబ్’ సినిమా కోసం ఫ్యాన్స్ ఎంతగానో ఎదురుచూస్తున్నారు. అయితే, వకీల్ సాబ్ చూసేందుకు పవన్ ఫ్యాన్స్ తో పాటు టాలీవుడ్ లెజెండరీ హీరో ఒకరు ఎంతో ఆసక్తిగా వెయిట్ చేస్తున్నారు.
అంతేకాదు, తన తల్లితో కలిసి కుటుంబ సమేతంగా థియేటర్ కు వెళ్లి మరీ సినిమా చూడబోతున్నానంటూ ఆ హీరో చెప్పారు. ఇంతకీ, వకీల్ సాబ్ ను రిలీజ్ రోజే కుటుంబసమేతంగా చూడాలనుకుంటున్న ఆ హీరో మరెవరో కాదు… టాలీవుడ్ మెగాస్టార్ చిరంజీవి. చాన్నాళ్ల తర్వాత పవన్ కల్యాణ్ ను వెండితెరపై చూడడానికి అభిమానులలాగే తాను కూడా ఎదురుచూస్తున్నానని చిరంజీవి అన్నారు. అంతేకాదు, అమ్మ అంజనాదేవి, ఇతర కుటుంబ సభ్యులతో కలిసి రేపు సాయంత్రం థియేటర్ కు వెళ్లి మరీ ‘వకీల్ సాబ్’ చిత్రం చూడబోతున్నానంటూ చిరు ట్వీట్ చేశారు.
సినిమా చూశాక తన అభిప్రాయాలను అభిమానులతో పంచుకోవడానికి తహతహలాడుతున్నానంటూ చిరు చేసిన ట్వీట్ వైరల్ అయింది. దీంతోపాటు, కెరీర్ తొలినాళ్లలో ‘తమ్ముడు’ పవన్ హెయిర్ స్టయిల్ ను స్వయంగా దువ్వెనతో సరిచేస్తున్న ఓ ఫొటోను ‘అన్నయ్య’ చిరంజీవి ట్వీట్ చేశారు. ప్రస్తుతం ఆ ఫొటో సోషల్ మీడియాలో హల్ చల్ చేస్తోంది.
