టీడీపీకి రాజీనామా చేసి వైసీపీలో చేరిన కేశినేని నాని…టీడీపీ అధినేత చంద్రబాబు, ఆయన తనయుడు లోకేష్ లపై సంచలన విమర్శలు చేస్తున్న సంగతి తెలిసిందే. వైసీపీలో చేరగానే జగన్ ఇంద్రుడు, చంద్రుడు అంటూ పొగుడుతున్న నాని…చంద్రబాబుపై మాత్రం వివాదాస్పద విమర్శలు చేస్తున్నారు. ఈ క్రమంలోనే కేశినేని నానికి దీటుగా బుద్దా వెంకన్న తాజాగా కౌంటర్ ఇచ్చారు. కేశినేని చంద్రబాబుపై నోరుపారేసుకున్న మొదటి రోజు నుంచి కేశినేనికి గట్టిగా కౌంటర్ ఇస్తున్న వెంకన్న తాజాగా మరోసారి కేశినేనిపై విమర్శలు గుప్పించారు.
కేశినేనికి చంద్రబాబు ఇచ్చిన గౌరవం, జగన్ ఇస్తున్న గౌరవం ఇది అంటూ ఓ వీడియోను వెంకన్న ట్వీట్ చేయగా అది వైరల్ గా మారింది. నాని కోవర్టు అని తెలియక చంద్రబాబు గతంలో ఆయనను పిలిచి మరీ గౌరవించారని, కోవర్టు అని తెలుసుగనకే కేశినేని నానిని జగన్ అగౌరవపరిచారని విమర్శించారు.
గతంలో సతీసమేతంగా ఆలయ దర్శనం తర్వాత చంద్రబాబు తనకు దూరంగా ఉన్న నానిని దగ్గరకు పిలిపించుకున్న వీడియోను, ప్రస్తుతం కేశినేని నానిని జగన్ అగౌరవించిన తీరున్న మరో వీడియోతో పోలుస్తూ వెంకన్నసెటైర్లు వేశారు.
అంబేడ్కర్ విగ్రహావిష్కరణ సందర్భంగా జగన్ ను కలిసిన కేశినేని నాని బొకే ఇచ్చి నమస్కరించడం, ఆ తర్వాత బొకేను ఎడమచేతితో అందుకున్న జగన్ వెంటనే పక్కన ఉన్న సెక్యూరిటీ సిబ్బందికి ఇవ్వడం వీడియోలో కనిపిస్తోంది. ఆ తర్వాత నాని వైపు కూడా చూడకుండా జగన్ అక్కడే ఉన్న మరో నేతను ఆప్యాయంగా తట్టడం, మిగతా వైసీపీ నేతలకు షేక్ హ్యాండ్ ఇచ్చి ఆప్యాయంగా పలకరించడం కనిపిస్తోంది. అప్పుడు చంద్రబాబు..ఇప్పుడు జగన్…కేశినేని నానికి ఇచ్చిన మర్యాద ఇదీ అన్న తేడా చూపిస్తూ వెంకన్న షేర్ చేసిన వీడియో వైరల్ గా మారింది.
“కోవర్ట్ నాని” అని తెలియక చంద్రబాబు గారు నీకు ఆరోజు ఇచ్చిన గౌరవం….!
నువ్వు కోవర్ట్ అని తెలుసు కాబట్టి జగన్ రెడ్డి నీకు ఇచ్చిన అగౌరవం..!@kesineni_nani pic.twitter.com/vD9gPtgS4F— Budda Venkanna (@BuddaVenkanna) January 20, 2024
