టాలీవుడ్ లో సీనియర్ నటుడు బాలయ్య(94) ఈ రోజు ఉదయం తుది శ్వాస విడిచారు. గత కొద్ది రోజులుగా అనారోగ్యంతో బాధపడుతున్న బాలయ్య హైదరాబాద్ యూసఫ్ గూడలోని తన స్వగృహంలో శనివారం ఉదయం కన్నుమూశారు. 1930 ఏప్రిల్ 9న గుంటూరు జిల్లా అమరావతి సమీపంలోని వైకుంఠపురంలో జన్మించిన మన్నవ బాలయ్య…నటుడు, నిర్మాత, దర్శకుడు, రచయిత ఇలా తన బహుముఖ ప్రజ్ఞతో చిత్రసీమకు ఎనలేని సేవలందించారు.
నటుడిగా దాదాపు 300కి పైగా చిత్రాల్లో నటించిన బాలయ్య…’ఎత్తుకు పైఎత్తు’ చిత్రంతో తెరంగేట్రం చేశారు. కృష్ణ నటించిన అల్లూరి సీతారామరాజు చిత్రంలో అగ్గిరాజు పాత్ర పోషించి మెప్పించారు. నిర్మాతగా, దర్శకుడిగా, కథా రచయితగా తన ప్రతిభ చూపారు. బాలయ్య నిర్మాతగా అమృత ఫిల్మ్స్ సంస్థ ద్వారా చెల్లెలి కాపురం (శోభన్ బాబు హీరో) నేరము – శిక్ష (కృష్ణ హీరో. కె. విశ్వనాథ్ దర్శకుడు) చుట్టాలున్నారు జాగ్రత్త, ఊరికిచ్చిన మాట (చిరంజీవి హీరో) లాంటి చిత్రాలను బాలయ్య నిర్మించారు. దర్శకుడిగా పసుపు తాడు, నిజం చెబితే నేరమా, పోలీసు అల్లుడు తెరకెక్కించారు.
ఉత్తమ కథా రచయితగా ఊరికిచ్చిన మాట చిత్రానికి బాలయ్య నంది అవార్డు అందుకున్నారు. చెల్లెలి కాపురం చిత్రానికి నిర్మాతగా నంది అవార్డు అందుకున్నారు. బాలయ్య కుమారుడు తులసీరామ్ కూడా కొన్ని చిత్రాల్లో కథానాయకుడిగా నటించారు. ఆ తర్వాత ఆయనతో ‘ఈ నాటి బంధం ఏ నాటిదో’, ‘చుట్టాలున్నారు జాగ్రత్త’ వంటి చిత్రాలు నిర్మించారు బాలయ్య. చిరంజీవితో ‘ఊరికిచ్చిన మాట’ నిర్మించడమే కాదు, ఆ చిత్రానికి దర్శకత్వమూ వహించారు. చివరగా బాలయ్య ‘శ్రీరామరాజ్యం’లో వశిష్టుని పాత్రలో కనిపించారు. బాలయ్య మృతిపట్ల టాలీవుడ్ ప్రముఖులు, రాజకీయ ప్రముఖులు తమ సంతాపం వ్యక్తం చేశారు.
బాలయ్య మృతి పట్ల టీడీపీ అధినేత నారా చంద్రబాబు నాయుడు సంతాపం తెలిపారు. ‘‘ప్రముఖ నటులు, సినీ దర్శక నిర్మాత మన్నవ బాలయ్య గారి మరణం విచారకరం. 300కు పైగా చిత్రాల్లో నటించిన బాలయ్య గారి మరణం తెలుగు సినీ పరిశ్రమకు తీరని లోటు. బాలయ్య గారి ఆత్మకు శాంతి చేకూర్చాలని భగవంతుని ప్రార్థిస్తూ… వారి కుటుంబ సభ్యులకు నా ప్రగాఢ సానుభూతిని తెలియజేస్తున్నాను’’ అని చంద్రబాబు అన్నారు. బాలయ్య మృతికి జనసేన పార్టీ రాజకీయ వ్యవహారాల కమిటీ ఛైర్మన్ శ్రీ నాదెండ్ల మనోహర్ సంతాపం తెలిపి ఆయన భౌతిక కాయానికి నివాళులు అర్పించారు.
