టాలీవుడ్ సీనియర్ హీరో, హిందూపురం ఎమ్మెల్యే నందమూరి బాలకృష్ణ జన్మదినం (జూన్ 10) సందర్భంగా ఆయనకు ఆయన కుటుంబ సభ్యులు, పలువురు రాజకీయ, సినీ ప్రముఖులు శుభాకాంక్షలు తెలియజేస్తున్నారు. ఏపీలో టీడీపీ కూటమి అఖండ విజయం సాధించిన తర్వాత వచ్చిన బర్త్ డే బాలయ్యకు స్పెషల్ కానుంది.
నా ముద్దుల బాలా మావయ్యకు జన్మదిన శుభాకాంక్షలు అని టీడీపీ జాతీయ ప్ర‌ధాన కార్య‌ద‌ర్శి, ఆయన అల్లుడు నారా లోకేశ్ అని ట్వీట్ చేశారు. స్వర్గీయ అన్న నందమూరి తారకరామారావు గారి అడుగుజాడల్లో నడుస్తూ అటు హిందూపూర్ ఎమ్మెల్యేగా, బసవతారకం క్యాన్సర్ ఆసుపత్రి చైర్మన్‌గా, సినిమా హీరోగా ఏది చేసినా సమాజసేవే పరమావధిగా అడుగులు వేస్తూ ప్రజల గుండెల్లో #GodOfMassesగా తనదైన ముద్ర వేసుకున్న నటసింహం నందమూరి బాలకృష్ణ గారికి హృదయపూర్వక జన్మదిన శుభాకాంక్షలు అని టీడీపీ ఏపీ అధ్య‌క్షుడు అచ్చెన్నాయుడు విషెస్ తెలిపారు.
బాల‌కృష్ణకు ఆయన సోద‌రి, బీజేపీ ఏపీ అధ్య‌క్షురాలు పురంధేశ్వరి పుట్టిన రోజు శుభాకాంక్షలు తెలిపారు. ‘‘పుట్టినరోజు శుభాకాంక్షలు బ్ర‌ద‌ర్‌! మీ కోరికలన్నీ నెరవేరి, మీరు కలలుగన్న అన్నింటా విజయాలు సాధించాల‌ని కోరుకుంటున్నా. నీపై ఎల్ల‌ప్పుడూ దేవుడి ఆశీర్వదాలు ఉండాలి’’ అని పురంధేశ్వరి ట్వీట్ చేశారు.
‘‘హ్యాపీ బ‌ర్త్‌డే బాలయ్య బాబు. ఈ ఏడాది కూడా మీకు అంతా మంచే జ‌ర‌గాల‌ని దేవుడిని ప్రార్థిస్తున్నాను. గొప్ప విజయాలు, మంచి ఆరోగ్యం, ఆనందంతో ఈ ఏడాది మీకు మరో అద్భుతమైన సంవత్సరంగా నిలిచిపోవాల‌ని కోరుకుంటున్నాను’’ అని మాస్ మహారాజా ర‌వితేజ ట్వీట్ చేశారు.
బర్త్ డే సందర్భంగా బాలకృష్ణ- బాబీ కాంబోలో తెరకెక్కుతున్న ‘ఎన్‌బీకే 109’ నుంచి వీడియో గ్లింప్స్ విడుదల చేశారు. జాలి, దయ పదాలకు అర్థం తెలియని ఓ అసురుడిగా బాలయ్య ఈ సినిమాలో కనిపించబోతున్నట్లు అర్థ‌మ‌వుతోంది. ఈ గ్లింప్స్‌లో బాలయ్య బాబు ఎంట్రీ వీర లెవ‌ల్లో ఉండడంతో ఆయన ఫ్యాన్స్ గూస్ బంప్స్ ఫీల్ అవుతున్నారు. ఈ చిత్రంలో బాలీవుడ్ స్టార్ నటుడు బాబీ డియోల్, ఊర్వశీ రౌతేలా, చాందిని చౌదరీ కీలక పాత్రల్లో నటిస్తున్నారు.
ఇక, బాలయ్య బాబు బర్త్ డే సందర్భంగా సురేష్ ప్రొడక్షన్స్ తమ యూట్యూబ్ ఛానెల్లో ఓ ప్రత్యేక వీడియోను విడుదల చేసింది. సమరసింహారెడ్డి నుంచి వీరసింహారెడ్డి వరకు బాలయ్య నటించిన గూస్ బంప్స్ సీన్లను కట్ చేసి ఒక వీడియో రూపొందించి జన్మదిన శుభాకాంక్షలు తెలిపారు.
