టిడిపి అధినేత నారా చంద్రబాబునాయుడు ఉభయగోదావరి జిల్లాల పర్యటన దిగ్విజయంగా కొనసాగుతున్న సంగతి తెలిసిందే. చంద్రబాబు ఎక్కడ రోడ్ షో పెట్టినా, బహిరంగ సభ నిర్వహించినా ఇసుకేస్తే రాలనంత జనం హాజరవుతున్నారు. ఈ జనాదరణ చూసి టిడిపి క్యాడర్లో ఫుల్ జోష్ వచ్చింది. ఈ క్రమంలోనే కొవ్వూరులో డ్వాక్రా, అంగన్వాడి, పొదుపు సంఘాల మహిళలతో సమావేశమైన చంద్రబాబు…. జగన్ పై సెటైర్లు వేశారు,
పాదయాత్రలో జగన్ ముద్దులు పెడితే ఏదో ఉద్ధరిస్తాడని జనం మోసపోయారని చంద్రబాబు ఎద్దేవా చేశారు. ఆనాడు ముద్దులు పెట్టిన జగన్ ఈనాడు మహిళలపై పిడిగుద్దులు కురిపిస్తున్నాడని దుయ్యబట్టారు. జగన్ పాలనలో మహిళలకు తీరని అన్యాయం జరుగుతోందని, డ్వాక్రా సంఘాల మహిళలను జగన్ సభలకు బలవంతంగా తరలిస్తున్నారని ఆరోపించారు. జగన్ సభలకు బలవంతంగా వచ్చిన జనం చప్పట్లు కొట్టకపోతే పెన్షన్, అమ్మఒడి కట్ చేస్తామని బెదిరిస్తున్నారని చంద్రబాబు ఆరోపించారు.
జనానికి జగన్ ఇచ్చే డబ్బుకు, జగన్ దోచుకునే డబ్బుకు పొంతనే లేదని చంద్రబాబు విమర్శించారు. మహిళల ఆత్మగౌరవం కోసం మరుగుదొడ్లు కట్టించి ఇస్తే వాటిపై కూడా వైసిపి ప్రభుత్వం పన్ను వేస్తోందని మండిపడ్డారు. ఇంత నీచమైన పాలన తన 40 ఏళ్ల రాజకీయ జీవితంలో చూడలేదని, ఊరికొక సైకోని జగన్ తయారు చేస్తున్నారని మండిపడ్డారు. జగన్ దయవల్ల 10వేల కోట్ల రూపాయల విలువైన అమర రాజా పరిశ్రమ తెలంగాణకు తరలిపోయిందని ఆవేదన వ్యక్తం చేశారు.
ఆంధ్రాకు చెందిన వ్యాపారవేత్త వేరే రాష్ట్రంలో పెట్టుబడులు పెట్టే పరిస్థితిని జగన్ తెచ్చాడని చంద్రబాబు ఆవేదన వ్యక్తం చేశారు. ఇలా అయితే యువతకు ఉద్యోగాలు ఎలా వస్తాయని జగన్ ను నిలదీశారు.
