హైదరాబాద్ కొంపల్లిలోని జైన్ ప్రెండ్స్ స్వ్కేర్ లో చైల్డ్ డెవలప్మెంట్ సెంటర్‌ను నిర్వహిస్తున్న అశోకా సంస్థ బాధ్యులపై పేట్ బషీరాబాద్ పీఎస్‌లో కేసు నమోదైంది. ఆ సెంటర్లో శిక్షణ తీసుకుంటున్న వినికిడి లోపంతో బాధ‌పడుతున్న తన పదకొండేళ్ల పాపపై నిర్వాహకులు, శిక్షకులు చేయి చేసుకున్నారని, ఇదేమని ప్రశ్నించిన తమపై యాజమాన్యం దురుసుగా ప్రవ‌ర్తించిందని పేర్కొంటు పాప తండ్రి గత శనివారం ఫిర్యాదు చేశారు. దీనిపై క్రైమ్ నెంబర్ 690/2025 పేరుతో బిఎన్ఎస్ సెక్షన్ 115(1), 75 జేజే సెక్షన్ల కింద కేసు నమోదు చేసి దర్యాప్తు చేస్తున్నారు.
ఈ సందర్భంగా అనుమతులు లేకుండా చైల్డ్ డెవలప్మెంట్ సెంటర్లు, ఆటిజం సెంటర్ల పేరుతో పుట్టగొడుగుల్లా సంస్థలు వెలిసి, అరకొర జ్ణానంతో ట్రీట్మెంట్ అందిస్తున్నారని, తద్వారా పిల్లలకు నష్టం జరగడమే కాకుండా, కష్టపడి సంపాదించిన దనం కోల్పోతున్నామని తల్లిదండ్రులు ఆవేదన వ్యక్తం చేస్తున్నారు. ఇలాంటి ఆటిజం సెంటర్లపై కఠిన చర్యలు తీసుకోవాల్సిందిగా ప్రభుత్వానికి విజ్ణప్తి చేస్తున్నారు.
ఇటీవల కాలంలో హైదరాబాద్ – సికింద్రాబాద్ జంట నగరాల్లో అనుమతిలేకుండా అనేక థెరపీ సెంటర్లు అరకొర జ్ణానంతో చేస్తున్న థెరపిస్ వ‌ల్ల అనేకమంది తల్లితండ్రులు మోసపోతున్నారు. అటువంటి కోవలో Universal global , Live wonderfully well , Original and Great Start వంటి మోసపూరిత పేర్లుతో పిల్లలు జీవితాలని వారి భవిష్య‌త్తును ప్రమాదంలో పెడుతున్నారని కొంతమంది తల్లితండ్రులు సమాజ సేవకులు అనేకమార్లు ప్రస్తావించడం కూడా జరిగింది. అయినప్పటకి ఈ సెంటర్ల ఆగడాలు మాత్రం ఆగడం లేదు. ఇటీవల జరిగిన సంఘటన కూడా ఆలస్యంగా వెలుగులోకిరావడం ఆశ్చర్యకరం. ఇలాంటి బాధిత తల్లితండ్రులు అనేకమంది అవేద‌న ఇంకా వెలుగులోకి రావలసి ఉంది.
