టాలీవుడ్ లో మాస్ డైరెక్టర్ గా బోయపాటి శ్రీనుకు మంచి ఇమేజ్ ఉంది. మాస్ పల్స్ ను పట్టడంలో….హీరోయిజాన్ని ప్రజెంట్ చేయడంలో బోయపాటి మార్క్ కనిపిస్తుంటుంది. ఇన, నందమూరి నటసింహం బాలకృష్ణకున్న మాస్ ఫాలోయింగ్ గురించి ప్రత్యేకంగా చెప్పక్కరలేదు. ఈ ఇద్దరు మాస్ స్పెషలిస్ట్ ల కాంబోలో వచ్చిన `సింహా`, `లెజెండ్` సినిమాలు బాక్సాఫీస్ ను షేక్ చేసిన సంగతి తెలిసిందే.
దీంతో, వీరిద్దరి కాంబోలో తెరకెక్కుతున్న తాజా చిత్రంపై భారీ అంచనాలు ఏర్పడ్డాయి. బోయపాటి డైరెక్షన్ లో బాలయ్య మరో పవర్‌ఫుల్ పాత్రలో కనిపించనున్నారు. దీంతో, ఈ సినిమాకు సంబంధించి రకరకాల టైటిల్స్ సోషల్ మీడియాలో చక్కర్లు కొడుతున్నాయి. అయితే, ఈ చిత్రానికి గాడ్ ఫాదర్ అనే టైటిల్ ఫిక్సయిందని తెలుస్తోంది.
బాలయ్య ఇమేజ్‌కు, ఆ కథకు ఈ టైటిలే సరిగ్గా సరిపోతుందని చిత్రబృందం నిర్ణయించిందట. త్వరలోనే దీనికి సంబంధించి అధికారిక ప్రకటన రాబోతోందని తెలుస్తోంది. ఇప్పటికే ఈ చిత్రానికి సంబంధించి విడుదల చేసిన`ఫస్ట్ రోర్` వైరల్ అయింది. బాలయ్య చెప్పిన పవర్‌ఫుల్ డైలాగ్ ఫ్యాన్స్ కు పూనకాలు తెప్పించింది. మరోవైపు, ఈ చిత్రాన్ని విశ్వవిఖ్యాత నట సార్వభౌమ ఎన్టీయార్ జన్మదినోత్సవం సందర్భంగా మే 28న విడుదల చేసేందుకు ప్రయత్నిస్తున్నారు.
