సుమ కనకాల.. ఈమె తెలియ‌ని బుల్లితెర ప్రేక్ష‌కులు ఉండ‌రు. పుట్టి పెరిగింది కేర‌ళ‌లో అయినా.. తెలుగులో అనర్గళంగా మాట్లాడుతూ టాలీవుడ్‌లో ఆల్ టైమ్ స్టార్ యాంక‌ర్‌గా గుర్తింపు పొందింది. ఎంత మంది కొత్త యాంక‌ర్లు వ‌చ్చినా.. ఏ రేంజ్‌లో అందాలు ఆర‌బోసినా.. సుమను ఏ మాత్రం బీట్ చేయ‌లేక‌పోయారు. క‌నీసం ఆమె ద‌రి దాపుల్లోకి కూడా వెళ్ల‌లేక‌పోయారు.
తన మాటల గారడీలతో, అదిరిపోయే పంచులతో ప్రేక్ష‌కుల‌ను క‌డుపుబ్బా న‌వ్వించే సుమ.. యాంకరింగ్‌లో త‌న‌కు సాటి లేరు ఎవరూ అనే విధంగా దూసుకుపోతోంది. ఇక ఏ షో చేసినా, ఏ ఈవెంట్ చేసినా సుమ రెమ్యున‌రేష‌న్ కూడా అత్యధికంగా ఉంటుంది. అయిన‌ప్ప‌టికీ ఏ సినిమా కార్య‌క్ర‌మం జ‌రిగినా సుమ‌నే యాంక‌ర్‌గా కావాల‌ని కోరుకుంటారు. అంత‌లా తనకంటూ ప్రత్యేక స్థానాన్ని సంపాదించుకున్నారామె.
తాజాగా `భీమ్లానాయక్‌` ప్రీ రిలీజ్ ఈవెంట్ వేడుకను హైదరాబాద్‌లోని యూసుఫ్‌ గూడ పోలీస్‌ గ్రౌండ్‌లో ఘనంగా నిర్వ‌హించారు మేక‌ర్స్. ఈ ఈవెంట్‌ను కూడా సుమ త‌నదైన హోస్టింగ్‌తో సూప‌ర్ స‌క్సెస్ చేసింది. అయితే ఇప్పుడు ఈ ఈవెంట్‌కు ఆమె తీసుకున్న రెమ్యున‌రేష‌న్ హాట్ టాపిక్‌గా మారింది. ఇంత‌కు ముందు ప్రి రిలీజ్ ఈవెంట్‌కు రూ. 4 ల‌క్ష‌ల వరకు పుచ్చుకున్న సుమ.. `భీమ్లా నాయ‌క్‌`కు మాత్రం ఏకంగా రూ. 7 ల‌క్ష‌ల రెమ్యున‌రేష‌న్ తీసుకుంద‌ని సోష‌ల్ మీడియాలో ఓ వార్త జోరుగా వైర‌ల్ అవుతోంది.
మ‌రి ఈ వార్త ఎంత వరకు నిజ‌మో తెలీదు గానీ.. సుమ ప్రీ రిలీజ్ ఈవెంట్‌కే అంత మొత్తంలో తీసుకుందా అని నెటిజ‌న్లు ఆశ్చ‌ర్యాన్ని వ్య‌క్తం చేస్తున్నార‌ట. కాగా, `భీమ్లా నాయ‌క్‌` విష‌యానికి వ‌స్తే.. ప‌వ‌ర్ స్టార్ పవన్ క‌ళ్యాణ్‌, రానా ద‌గ్గుబాటి ప్ర‌ధాన పాత్ర‌ల్లో తెర‌కెక్కిన యాక్ష‌న్ ఎంట‌ర్‌టైన‌ర్ చిత్ర‌మిది. సాగ‌ర్ కె. చంద్ర ద‌ర్శ‌క‌త్వంలో రూపుదిద్దుకున్న ఈ సినిమా ఫిబ్ర‌వ‌రి 25న అట్ట‌హాసంగా విడుద‌ల కాబోతోంది.
