టాలీవుడ్ ‘రౌడీ’ హీరో విజయ్ దేవరకొండ, విలక్షణ దర్శకుడు పూరీ జగన్నాథ్ కాంబినేషన్ లో తెరకెక్కుతోన్న ‘లైగర్’ చిత్రంపై భారీ అంచనాలున్న సంగతి తెలిసిందే. వరల్డ్ ఫేమస్ లవర్ వంటి డిజాస్టర్ తర్వాత విజయ్ దేవరకొండ నటిస్తున్న ఈ చిత్రంపై రౌడీ ఫ్యాన్స్ గంపెడాశలు పెట్టుకున్నారు. ఆ అంచనాలకు తగ్గట్లే ఈ చిత్రంలో ప్రపంచ ప్రఖ్యాత బాక్సర్ మైక్ టైసన్ కూడా నటిస్తున్నాడు. ఇక, తాజాగా ఈ చిత్రం గురించిన మరో ఇంటరెస్టింగ్ అప్డేట్ టీ టౌన్ లో చక్కర్లు కొడుతోంది.
ఆల్రెడీ ఈ సినిమాలో మైక్ టైసన్ పాత్రపై చాలా క్యూరియాసిటీ ఉంది. విజయ్ తో పాటు టైసన్ పోటీపడతాడా? లేక కోచ్ గా వ్యవహరిస్తాడా? అన్న డైలమా ప్రేక్షకుల్లో ఉంది. ఈ క్రమంలోనే ఈ సినిమాలో నందమూరి నటసింహం, మాస్ కా బాప్ బాలకృష్ణ ఓ కీలక పాత్ర పోషిస్తున్నారని పుకార్లు వినిపిస్తున్నాయి. ఈ నేపథ్యంలోనే గోవాలో లైగర్ షూటింగ్ సెట్ లో బాలయ్య సందడి చేశారని టాక్ వస్తోంది.
ఈ చిత్రానికి హైప్ తెచ్చేందుకు టైసన్ తో పాటు బాలయ్యబాబు చేత ఓ 5 నిమిషాల క్యామియోను పూరి జగన్నాధ్ చేయించినట్టు తెలుస్తోంది. వాస్తవానికి టైసన్ పాత్రకు బాలయ్య వాయిస్ ఓవర్ ఇస్తాడని పుకార్లు వినిపించాయి. అయితే, ఇప్పుడు ఏకంగా లైగర్‌లో ‘లయన్’ అతిధి పాత్రను పోషిస్తున్నట్లు గట్టిగా ప్రచారం జరుగుతోంది. ఒకవేళ ఆ టాక్ నిజమైతే..ఇప్పటికే అఖండతో మంచి ఊపుమీదున్న బాలయ్య ఫ్యాన్స్…రౌడీ ఫ్యాన్స్ తో కలిసి పండగ చేసుకుంటారనడంలో డౌట్ లేదు. మరి, ఈ పుకార్లలో నిజమెంతో తేలాలంటే మరికొద్ది రోజులు వెయిట్ చేయక తప్పదు.
