హీరో కొడుకులు నటవారసులుగా.. అదే కుమార్తెలు అయితే ఫ్యాషన్ రంగంలోనో.. లేదంటే సినిమా ఇండస్ట్రీలోనే గ్లామర్ పండించే పాత్రకు భిన్నమైనవి చేస్తుంటారు. ఇది టాలీవుడ్ లెక్క. అదే.. బాలీవుడ్ లో అయితే.. అలాంటివేమీ ఉండవు. హీరో.. హీరోయిన్ ఎవరైనా సరే.. తమ సంతానాన్ని తమకు మించిన స్థాయికి తీసుకెళ్లేందుకు ప్రోత్సహిస్తారు. అయితే.. వీరందరికి భిన్నమైన స్టోరీ ఆ హీరో కుమార్తెది. భోజ్ పురి నటుడిగా సుపరిచితుడైనప్పటికీ.. రేసుగుర్రంలో విలన్ పాత్ర పోషించాక తెలుగు ప్రేక్షకులకు సుపరిచితమయ్యారు రవికిషన్.
దాదాపు రెండు దశాబ్దాలుగా సినిమా ఇండస్ట్రీలో ఉంటున్న ఆయన.. పలు బాలీవుడ్ మూవీస్ లోనూ నటించారు. తాజాగా ఆయన తన కుమార్తె కారణంగా వార్తల్లోకి వచ్చారు. గ్లామర్ ప్రపంచంలో ఉన్న వారు ఆ రంగంలోకి రావటానికి.. పేరు ప్రఖ్యాతుల్ని సొంతం చేసుకోవటానికి మక్కువ చూపుతారు. అయితే.. రవికిషన్ కుమార్తె ఇషితా కిషన్ మాత్రం భిన్నమైన రంగాన్ని ఎంచుకొని అందరి మనసుల్ని దోచుకుంటోంది.
కేంద్రప్రభుత్వం తీసుకొచ్చిన అగ్నిపథ్ స్కీం కింద ఎంపికైన ఆమె.. తాజాగా జాబ్ లోకి జాయిన్ అయ్యింది. ఈ విషయాన్ని రవికిషనే స్వయంగా ప్రకటించారు. ఆర్మీలో జాయిన్ అయి.. దేశ సేవలో తనవంతు కృషి చేస్తున్న విషయాన్ని తెలుసుకున్న వారంతా ఆమె నిర్ణయానికి ఫిదా కావటమే కాదు.. ఆమెను ప్రశంసిస్తున్నారు. అంతేకాదు.. కుమార్తెను తనకు నచ్చిన రంగంలోకి వెళ్లేలా ప్రోత్సహించిన వైనాన్ని అభినందిస్తున్నారు.
సినీ నటుడిగా సుపరిచితుడైన రవికిషన్.. గోరఖ్ పూర్ ఎంపీగా బీజేపీపార్టీ తరఫున వ్యవహరిస్తున్నారు. నటుడిగా ఉంటూనే ప్రజాసేవలోకి వెళ్లిన ఆయన..తాజాగా మాత్రం సినిమాలకు కాస్తంత గ్యాప్ ఇచ్చారు. ముగ్గురు కుమార్తెలున్న ఆయన పెద్ద కుమార్తె ఆర్మీలో జాయిన్ కావటం పలువురికి స్ఫూర్తివంతంగా మారింది. తాజాగా తన కుమార్తెతో దిగిన ఫోటోను షేర్ చేయగా.. పలువురు ఈ తండ్రీ కుమార్తెల్ని అభినందిస్తున్నారు.
