అసలే రాజమౌళి సినిమా.. పైగా మహేష్ బాబు హీరో అంటే అంచనాలు ఏ స్థాయిలో ఉంటాయో ప్రత్యేకంగా చెప్పాల్సిన పని లేదు. పైగా తమ కలయికలో రాబోయే సినిమా గురించి మాట్లాడుతూ ‘ఇండియనా జోన్స్’ తరహాలో ఉంటుందని చెప్పడమే కాక.. ‘గ్లోబ్ ట్రోటింగ్’ అని ఏదో పెద్ద పదమే వాడాడు జక్కన్న. ఈ చిత్రం కోసం భారతీయ ప్రేక్షకులే కాక.. ఇంటర్నేషనల్ ఆడియన్స్ కూడా ఎంతో ఆసక్తిగా ఎదురు చూస్తున్నారనడంలో సందేహం లేదు. ఐతే ఎప్పట్లాగే ఈ చిత్రానికి కూడా ప్రి ప్రొడక్షన్ కోసం చాలా సమయమే తీసుకుంటున్నాడు రాజమౌళి.
మహేష్ బాబు పుట్టిన రోజుకైనా సినిమా మొదలవుతుందేమో, లేదా కనీసం అప్‌డేట్ అయినా ఇస్తారేమో అనుకుంటే.. అలాంటి సంకేతాలేమీ కనిపించడం లేదు. సినిమా గురించి కబురు ఎప్పుడు వినిపిస్తారో కానీ.. ఈ లోపు ఈ చిత్రం గురించి రకరకాల ప్రచారాలు జరిగిపోతున్నాయి. ముఖ్యంగా టైటిల్ గురించి ఇప్పుడో న్యూస్ వైరల్ అవుతోంది.
రాజమౌళి-మహేష్ సినిమా కోసం ‘గోల్డ్’ అనే టైటిల్‌ను పరిశీలిస్తున్నారని వార్తలొస్తున్నాయి. ఈ సినిమా బంగారు నిధి వేట నేపథ్యంలో సాగుతుందని.. అందుకే ప్రపంచవ్యాప్తంగా అందరికీ కనెక్ట్ అయ్యేలా ఈ టైటిల్ పెట్టాలని చూస్తున్నారని అంటున్నారు. ఐతే ఈ పేరుతో ఇండియాలోనే కాదు.. అంతర్జాతీయ స్థాయిలోనూ సినిమాలున్నాయి.
మలయాళంలో రెండేళ్ల కిందటే ఈ పేరుతో ఓ సినిమా వచ్చింది. పృథ్వీరాజ్ సుకుమారన్ హీరోగా ‘ప్రేమమ్’ దర్శకుడు ఈ చిత్రాన్ని రూపొందించాడు. కాకపోతే ఆ చిత్రం డిజాస్టర్ అయింది. అంతకంటే ముందు బాలీవుడ్లో అక్షయ్ కుమార్ హీరోగా ఈ పేరుతో ఓ సినిమా తెరకెక్కింది. అది మంచి విజయం సాధించింది. ఇక అంతర్జాతీయ స్థాయిలోనూ ఈ పేరుతో సినిమాలున్నాయి. ఈ నేపథ్యంలో ‘గోల్డ్’ అనేది కథకు టైటిల్ యాప్ట్ అయినప్పటికీ.. దీన్నే ఫిక్స్ చేసే అవకాశాలు తక్కువే.
