దాదాపు నాలుగేళ్ల కిందట దిల్ రాజు అనౌన్స్ చేసిన ‘గేమ్ చేంజర్’ మూవీ ఇంకా కూడా పూర్తి కాలేదు. షూటింగ్ చివరి దశలో ఉందని కొన్ని నెలల ముందు నుంచి చెబుతున్నారు. కానీ అదెప్పుడు పూర్తి అవుతుంది, ఎప్పుడు ప్రేక్షకుల ముందుకు వస్తుంది అనే విషయాల్లో మాత్రం క్లారిటీ రావడం లేదు. ఇంతకుముందు ప్రచారం జరిగినట్లు అక్టోబరులో ఈ చిత్రం వస్తుందనే నమ్మకం అభిమానుల్లో కలగట్లేదు.
అసలు ఈ ఏడాది ‘గేమ్ చేంజర్’ రిలీజవుతుందా అని వాళ్లు సందేహిస్తున్నారు. ఐతే ఈ చిత్రం ఇంత ఆలస్యం కావడానికి ప్రధాన బాధ్యుడు దర్శకుడు శంకర్ అయినా.. ఆయనకు అభిమానులతో కనెక్షన్ ఉండదు కాబట్టి నిర్మాత దిల్ రాజును టార్గెట్ చేస్తున్నారు. గేమ్ చేంజర్ అప్‌డేట్ లేదని, మరీ ఆలస్యం అవుతోందని.. తరచుగా దిల్ రాజు ను ట్రోల్ చేస్తుంటారు మెగా ఫ్యాన్స్.
తాజాగా మరోసారి దిల్ రాజును ట్రోల్ చేస్తున్నారు చరణ్ అభిమానులు. అందుక్కారణం.. రాజు తన భార్య తేజస్వినితో కలిసి విహార యాత్రకు వెళ్లి ఆ ఫొటోలను సోషల్ మీడియాలో షేర్ చేయడమే. నిజానికి సినిమా ఆలస్యం కావడానికి, దిల్ రాజు విహార యాత్రకు వెళ్లడానికి ఏ సంబంధం లేదు. సినిమా వేరు, వ్యక్తిగత జీవితం వేరు. కానీ ఫ్యాన్స్ మాత్రం ‘గేమ్ చేంజర్’ను పట్టించుకోకుండా వదిలేసి ఇలా టూర్లు వేస్తున్నారా అంటూ ఆయన మీద కౌంటర్లు వేస్తున్నారు.
కొందరేమో ‘గేమ్ చేంజర్’ హీరో హీరోయిన్ల ఆన్ లొకేషన్ పిక్స్ అంటూ పంచులు వేస్తున్నారు. ఐతే వేరే దర్శకులనైనా రాజు అజమాయిషీ చేయగలరు కానీ.. శంకర్‌ను ఆయన హ్యాండిల్ చేయలేరన్నది వాస్తవం. ‘గేమ్ చేంజర్’ విషయంలో రాజే అతి పెద్ద బాధితుడు అనే విషయం మరిచిపోతుంటారు. ఈ సినిమా రిలీజ్, అప్‌డేట్ల సంగతి పూర్తిగా శంకర్ చేతుల్లోనే ఉంది. కాబట్టి వ్యక్తిగత జీవితంలోకి కూడా వెళ్లిపోయి ఆయన్ని టార్గెట్ చేయడం కరెక్ట్ కాదు.
