ఏపీ సీఎం జ‌గ‌న్‌పై టీడీపీ అధినేత చంద్రబాబు హాట్ కామెంట్స్ చేశారు. “జగన్ రెడ్డి.. రెడ్డికాదు.. రివర్స్ రెడ్డి“ అని చంద్రబాబు వ్యాఖ్యానించారు. తాజాగా సీఎం జగన్ ప‌శ్చిమ గోదావ‌రి జిల్లా పర్యటన నేప‌థ్యంలో చంద్రబాబు ఈ వ్యాఖ్య‌లు చేయ‌డం ఆస‌క్తిగా మారింది.
నర్సాపురంలో సీఎం జగన్ మోహన్ రెడ్డి పర్యటన పేరుతో చెట్ల నరికివేతపై చంద్రబాబు నాయుడు తీవ్రస్థాయిలో విరుచుకుపడ్డారు. ట్విట్టర్ వేదికగా స్పందించారు.
‘‘సాధారణంగా ప్రజాప్రతినిధులు తమ పర్యటనల్లో మొక్కలు నాటడం ఇన్నాళ్లూ చూశాం. కానీ సీఎం వస్తున్నారని భారీ వృక్షాలను…అది కూడా ఏ మాత్రం అడ్డుగాలేని చెట్లను నరికి వేయడం ఈ ప్రభుత్వంలో నే చూస్తున్నాం. మొక్కలు నాటడం నేర్పాల్సిన పాలకులు… చెట్లు నరికెయ్యమని సందేశం పంపుతున్నా రా? ఇదే కదా రివర్స్ పాలన అంటే. నువ్వు జగన్ రెడ్డి కాదు… రివర్స్ రెడ్డి. ఇదేం ఖర్మ రాష్ట్రానికి?’’ అంటూ చంద్రబాబు ట్వీట్ చేశారు.
మ‌రో ట్వీట్‌లో తిరుపతిలో నడిరోడ్డుపై మహిళ ప్రసవించిన ఘటనపై చంద్రబాబు చాలా ఘాటుగా స్పందించారు. ‘‘తిరుపతి ఘటనతో హృదయం చెలించిపోతోంది. నడిరోడ్డుపై మహిళా ప్రసవం గుండెను కాల్చివేస్తుంది. తోడుగా సహాయకులు లేరని పురిటి నొప్పులతో వచ్చిన మహిళలను ప్రసూతి ఆసుపత్రి సిబ్బంది చేర్చుకోపోవడం దారుణం. స్థానికులు దుప్పట్లు అడ్డుపెట్టి ప్రసవం చేయాల్సిన పరిస్థితి ఎందుకు వచ్చింది’’ అని చంద్రబాబు తీవ్ర ఆగ్రహం వ్యక్తం చేశారు.
