హీరో కళ్యాణ్ రామ్ సొంత బ్యానర్లో చేసిన సినిమా బింబిసారి మంచి హిట్ గా నిలిచిన సంగతి తెలిసిందే. సొంత బేనర్లో ఈ సినిమా చేయడమే కాక.. తన కెరీర్లోనే అత్యధిక బడ్జెట్ పెట్టి కళ్యాణ్ రామ్ చేసిన ఈ సాహసానికి గొప్ప ఫలితమే దక్కింది. పెట్టుబడి మీద రెండు మూడు రెట్ల ఆదాయంతో పెద్ద బ్లాక్‌బస్టర్‌గా నిలిచిందీ సినిమా. ఈ ఉత్సాహంతో తన కొత్త చిత్రాల మీద ఫోకస్ పెట్టాడు కళ్యాణ్ రామ్. ఈ నందమూరి హీరో ఆల్రెడీ ఒక సినిమాను విడుదలకు సిద్ధం చేయడం విశేషం. మైత్రీ మూవీ మేకర్స్ నిర్మాణంలో తెరకెక్కిన ఆ చిత్రాన్ని రాజేంద్ర రెడ్డి అనే కొత్త దర్శకుడు రూపొందించాడు.
ఈ మధ్యే ఆ సినిమా ప్రి లుక్ లాంచ్ చేశారు. అందులో కళ్యాణ్ రామ్ గన్ను పట్టుకుని విధ్వంసానికి సిద్ధమవుతున్నట్లు కనిపించాడు. ఈ సినిమాకు తాజాగా టైటిల్ ఖరారు చేశారు. అలాగే రిలీజ్ డేట్ కూడా దాదాపు ఖాయం అయినట్లే కనిపిస్తోంది. తన చివరి సినిమా ‘బింబిసార’ను చారిత్రక, జానపద నేపథ్యం ఉన్న కథతో చేసిన కళ్యాణ్ రామ్.. ఈసారి పూర్తి మోడర్న్ స్టోరీతో రాబోతున్నాడన్నది స్పష్టం. ఎందుకంటే ఈ చిత్రానికి ‘అమిగోస్’ అనే టైటిల్ ఖాయం చేశారట. అమిగోస్ అంటే స్పానిష్‌లో స్నేహితులు అని అర్థం. ప్రి లుక్‌లో హీరో గన్ను పట్టుకుని వయొలెంట్‌గా కనిపించినప్పటికీ.. టైటిల్ మాత్రం సాఫ్ట్‌గా అనిపిస్తోంది.
మరి ఈ వైరుధ్యం ఏంటో చూడాలి. ఇక కళ్యాణ్ రామ్ 19వ సినిమాగా తెరకెక్కుతున్న ‘అమిగోస్’ను డిసెంబరు 2న విడుదల చేయబోతున్నట్లు సమాచారం. అదే రోజు అడివి శేష్ మూవీ ‘హిట్-2’ కూడా రిలీజ్ కాబోతోంది. కాబట్టి ఆ రోజు ఆసక్తికర బాక్సాఫీస్ సమరం చూడబోతున్నామన్నమాట. ‘బింబిసార’ రిలీజైన నాలుగు నెలల లోపే కళ్యాణ్ రామ్ ఇంకో సినిమాతో పలకరించబోతుండడం విశేషం. ‘బింబిసార’ సూపర్ సక్సెస్ అయిన నేపథ్యంలో ‘అమిగోస్’ను బాగా ప్రమోట్ చేసి పెద్ద స్థాయిలో రిలీజ్ చేయడానికి మైత్రీ మూవీ మేకర్స్ ప్రణాళికలు రచిస్తోంది.
