కన్నడ స్టార్ హీరో యష్, ఏస్ డైరెక్టర్ ప్రశాంత్ నీల్ ల కాంబోలో తెరకెక్కిన కేజీఎఫ్ చిత్రం భారీ విజయాన్ని సాధించిన సంగతి తెలిసిందే. దీంతో, ఏప్రిల్ 14న ప్రపంచవ్యాప్తంగా విడుదల కాబోతోన్న కేజీఎఫ్-2పై భారీ అంచనాలున్నాయి. ఆ అంచనాలకు తగ్గకుండానే ఇప్పటివరకు విడుదలైన ట్రైలర్, రెండు పాటలు యూట్యూబ్ లో రచ్చ చేశాయి. మరోసారి యష్ మాస్ పర్ఫార్మెన్స్ తో ప్రేక్షకులకు పూనకాలు ఖాయమని అంటున్నారు.
అందుకే, నైజాం హక్కులను ప్రముఖ నిర్మాత దిల్ రాజు ఏకంగా రూ.50 కోట్లకు, ఏపీ+సీడెడ్ హక్కులు ఏకంగా రూ.60 కోట్లకు పైగా అమ్ముడయ్యాయి. మరో మూడు రోజుల్లో చిత్రం విడుదల కాబోతుండడంతో తెలుగు రాష్ట్రాల్లో తమ సినిమా ప్రమోషన్ కోసం యష్ అండ్ టీం వచ్చింది. తిరుపతిలో శ్రీవారిని దర్శించుకున్న యష్ …మీడియాతో మాట్లాడారు. ‘బాహుబలి’ రికార్డులను ‘కేజీఎఫ్ 2’ బద్దలు కొడుతుందా? అనే ప్రశ్నకు యష్ ఆసక్తికర సమాధానమిచ్చాడు.
పాత సినిమా రికార్డులను కొత్తవి బద్దలు చేస్తేనే పురోగతి అని, కలెక్షన్లు, రికార్డులు మారుతూనే ఉంటాయని అన్నాడు. బీస్ట్ సినిమా కూడా విజయం సాధించాలని, దేవుడు ఏది నిర్ణయిస్తే అదే జరుగుతుందని వేదాంత ధోరణిలో చెప్పుకొచ్చాడు. సినిమాపై ప్రేక్షకుల ప్రేమ ఎంత ఉందనేదే చాలా ముఖ్యమన్నాడు. పార్ట్ 2లో మదర్ సెంటిమెంట్ ఎక్కువగా ఉంటుందని, ఇది తల్లీ కొడుకుల సినిమా అని, సినిమాలో అదే మెయిన్ ఎమోషన్ అని రాఖీ భాయ్ స్టోరీ రివీల్ చేశాడు.
సెకండ్ పార్ట్ లో కథలోనే పెద్ద డిఫరెన్స్, ఎలివేషన్ ఉందన్నాడు. మొదటి భాగంలో నరాచీలో కేవలం తన హావభావాలు, యాక్షన్ సీన్స్ ఉన్నాయని, సెకండ్ చాప్టర్ లో తనకు నటించే అవకాశం చాలా ఉందని చెప్పుకొచ్చాడు.
