ఈ అమ్మాయి గురించి మీకు చెప్పాలి. సుధీర్ బాబు హీరోగా న‌టిస్తున్న కొత్త చిత్ర‌మిది. ఇంద్ర‌గంటి మోహ‌న‌కృష్ణ ద‌ర్శ‌కుడు. ఇందులో క‌థానాయిక కృతి శెట్టి. సుధీర్ బాబు చెప్ప‌బోయేది ఆ అమ్మాయి గురించే. ఐతే ఈ సినిమాలో సుధీర్ బాబే కాదు.. ఇండ‌స్ట్రీ జ‌నాలు కూడా ఇప్పుడు ఈ అమ్మాయి గురించే చెప్పుకుంటున్నారు.
అరంగేట్ర చిత్రం ఉప్పెన‌తోనే కృతి సెన్సేష‌న్ క్రియేట్ చేసింది. ఆ సినిమాకు విడుద‌ల‌కు ముందు హైప్ రావ‌డంలో కృతిది కీల‌క పాత్ర అన‌డంలో సందేహం లేదు. టిపిక‌ల్ అందంతో, హావ‌భావాల‌తో ప్రోమోల్లో ఈ అమ్మాయి కుర్రాళ్ల మ‌న‌సు దోచేసింది. ఈ సినిమా ఏకంగా వంద కోట్ల గ్రాస్ కొల్ల‌గొట్టి సంచ‌ల‌నం రేపింది. ప్రోమోల్లోనే కాదు.. సినిమాలోనూ కృతి ప్ర‌ధాన ఆక‌ర్ష‌ణ‌గా నిలిచింది. ఐతే ఈ విజ‌యాన్ని ఆమె ఏమాత్రం నిల‌బెట్టుకుంటుంది.. అన్ని పాత్ర‌ల‌కూ సూట‌వుతుందా అన్న సందేహాలు క‌లిగాయి.
రెండో సినిమా శ్యామ్ సింగ రాయ్ ప్రోమోలు చూస్తే కృతి పెద్ద‌గా హైలైట్ కాలేదు. సాయిప‌ల్ల‌వి ఉండ‌గా ఇంకో హీరోయిన్ అస‌లెలా హైలైట్ అవుతుంది. నిజానికి సినిమాలో కృతి పాత్ర చెప్పుకోద‌గ్గ స్థాయిలో లేదు. పెర్పామెన్స్ ప‌రంగా సాయిప‌ల్ల‌వే పైచేయి సాధించింది. కానీ ఇందులో నానితో క‌లిసి కృతి చేసిన బోల్డ్ సీన్లు యూత్‌ను బాగానే ఆక‌ర్షించాయి.
అనేక సందేహాల‌ను ప‌టాపంచ‌లు చేస్తూ శ్యామ్ సింగ రాయ్ బాక్సాఫీస్ ద‌గ్గ‌ర మంచి ఫ‌లితాన్నే అందుకుంది. తొలి రోజు వచ్చిన టాక్, బాక్సాఫీస్ ప‌రిస్థితులు చూస్తే ఈ చిత్రం ఏమాత్రం ఆడుతుందో అనుకున్నారు. కానీ సినిమా అంచ‌నాల్ని మించే వ‌సూళ్లు రాబ‌ట్టి హిట్ స్టేట‌స్ అందుకుంది. దీంతో కృతి ఖాతాలో మ‌రో హిట్ ప‌డిపోయింది.
ఇలా ఒక హీరోయిన్ కెరీర్ ఆరంభంలో చేసిన రెండు సినిమాలు వ‌రుస‌గా హిట్ట‌యితే ఇంకేముంది.. అంతా ఆమె వెంటే ప‌డ‌తారు. ఆల్రెడీ కృతి బంగార్రాజు, ఈ అమ్మాయి గురించి మీకు చెప్పాలి లాంటి క్రేజీ మూవీస్‌లో న‌టిస్తోంది. ఆ రెండు చిత్రాలూ పాజిటివ్ బ‌జ్‌తో క‌నిపిస్తున్నాయి. అవి అంచ‌నాల‌ను అందుకుని హిట్ట‌యితే కృతి టాలీవుడ్ మోస్ట్ వాంటెడ్ హీరోయిన్ల‌లో ఒక‌రైపోతుందేమో.
