తమిళ బిగ్ బాస్ షోకు సంబంధించిన ఒక వీడియో ఇప్పుడు సోషల్ మీడియాలో సంచలనం రేపుతోంది. తమిళ, తెలుగు భాషల్లో వందకు పైగా సినిమాల్లో నటించిన విచిత్ర అనే క్యారెక్టర్ నటి.. ఒక టాలీవుడ్ సీనియర్ టాప్ హీరో మీద చేసిన ఆరోపణలు చర్చనీయాంశంగా మారాయి. ఆ హీరో వల్ల తన కెరీరే నాశనమైందంటూ.. ఒక కాస్టింగ్ కౌచ్ అనుభవాన్ని ఆమె ఈ షోలో పంచుకుంది.
2000 ప్రాంతంలో తాను ఒక తెలుగు సినిమాలో నటించానని.. ఆ చిత్ర షూటింగ్ కేరళలోని అటవీ ప్రాంతంలో జరిగిందని ఆమె తెలిపింది. అందులో తాను ఒక క్యారెక్టర్ రోల్‌లో నటించానని.. ఒక రోజు షూటింగ్ ముగించుకుని హోటల్‌కు వెళ్లగా అక్కడ ఆ సినిమా హీరో తనను చూసి.. కనీసం పేరు కూడా అడగకుండా, ఈ సినిమాలో నటిస్తున్నావా అని మాత్రమే అడిగి.. తన గదికి వచ్చేయమన్నాడని విచిత్ర వెల్లడించింది. ఐతే తాను ఆయన గదికి వెళ్లకుండా పడుకుని నిద్రపోయానని.. ఐతే మరుసటి రోజు నుంచి తనకు వేధింపులు తప్పలేదని ఆమె తెలిపింది.
షూటింగ్ స్పాట్లో తనను రకరకాల ఇబ్బందులకు గురి చేశారని.. రాత్రయ్యాక హోటల్ గది తలుపులు బాదేవారని.. ఆ హోటల్ మేనేజర్ సాయంతో తాను తప్పించుకుని వేరే గదికి మారానని విచిత్ర వెల్లడించింది. తాను వేరే గదికి మారాక కూడా తాను అంతకుముందున్న గది తలుపులు బాదుతున్న శబ్దం వినిపించేదని ఆమె తెలిపింది.
తాను ఇలా తప్పించుకోవడం ఇష్టం లేక ఆ హీరోకు సంబంధించిన వాళ్లు తనకు ఒక గుణపాఠం నేర్పాలని అనుకున్నారని.. ఆ క్రమంలోనే తర్వాత ఓ సన్నివేశం తీస్తుండగా ఒక వ్యక్తి తనను ఒకటికి రెండుసార్లు అసభ్యంగా తాకాడని.. తాను ఆ వ్యక్తిని గుర్తించి తన మీద స్టంట్ మాస్టర్‌కు ఫిర్యాదు చేస్తే.. అతను తిరిగి తననే చెంపదెబ్బ కొట్టాడని.. అంత జరిగినా దర్శకుడు, నిర్మాత సహా టీంలో ఎవ్వరూ తనకు మద్దతుగా నిలవలేదని విచిత్ర తెలిపింది.
తర్వాత తన స్నేహితురాలి సూచన మేరకు స్టంట్ యూనియన్‌లో ఫిర్యాదు చేస్తే వాళ్లు కూడా ఎలాంటి చర్యలు తీసుకోలేదని.. రెండు రోజుల తర్వాత పోలీసులకు ఫిర్యాదు చేయమని చెప్పారని.. కొంతమంది ఈ సంగతి వదిలేసి పని చూసుకోవాలని సలహా ఇచ్చారని విచిత్ర తెలిపింది.
ఈ చేదు అనుభవం తనను మానసికంగా కుంగదీసిందని.. ఆ సమయంలో తనకు కాబోయే భర్త మద్తతుగా నిలిచాడని.. తనకు గౌరవం లేదని ఈ ఇండస్ట్రీలో కొనసాగడం అవసరమా అని అతను అనడంతో నెమ్మదిగా సినిమాలకు దూరం అయిపోయానని.. కానీ 22-23 ఏళ్లుగా ఈ బాధను తాను మోస్తున్నానని.. ఇప్పుడు ఆ బాధను బయట పెట్టడానికి సరైన వేదికగా అనిపించి బిగ్ బాస్‌లో ఈ విషయం చెబుతున్నానని విచిత్ర ఏడుస్తూ మాట్లాడింది. తనకు ఈ చేదు అనుభవం ఎదురైన సినిమా పేరు, తనను వేధించిన హీరో పేరు విచిత్ర ఇక్కడ చెప్పకపోయినా.. సోషల్ మీడియాలో మాత్రం నెటిజన్లు ఆ రెండు విషయాలను బయటపెట్టి సదరు హీరోను ట్రోల్ చేస్తున్నారు.
